Lahad mein ishq e rukh e shah kaa daagh ley key chale
Andheri raat suni thi charaagh ley key chale
Tere gulaamon ka naqsh e qadam hay raah e Khuda
Woh kya behek sakey jo yeh suraagh ley key chale
Jinaan banegi muhibbaan e chaar yaar ki qabr
Jo apne seene mein ye chaar baagh le key chale
Gaye, ziyaarat e dar ki, sad aah waapas aaye
Nazar key ashk piche dil ka daagh le key chale
Madeene jaan e jinaan o jahaan hay wo sun lein
Jinhein junoon e jinaan sooye zaagh le key chale
Tere sahaaab e sukhan sey na nam key nam sey bhi kam
Baleegh behr e balaaghat balaagh le key chale
Huzoor e Taibah sey bhi koi kaam barh kar hay
Key jhoote heele makr o faraagh le key chale
Tumhare wasf e jamaal o kamaal mein jibraeel
Muhaal hay key majaal o masaagh le key chale
Gilah nahin hay mureed rasheed e shaitaan sey
Keh us key wusa’at e ilmi ka laagh le key chale
Har eik apne bare ki barayi karta hay
Har eik mugbachah mugh ka ayaagh le key chale
Magar Khuda pe jo dhabba darogh ka thopa
Ye kis la’een ki ghulaami ka daagh le key chale
Wuqoo’ e kizb key ma’ni durust aur qudoos
Hiye ki phoote ‘ajab sabz baagh le key chale
Jahaan mein koi bhi kaafir saa kaafir aisaa hay
Ke apne Rab pe safaahat ka daagh le key chale
Pari hay andhe ko ‘aadat keh shorbe hi sey khaaye
Bater haath nah aayi to zaagh le key chale
Khabees behr e khabeesah khabeesah behr e khabees
Ke saath jins ko baazo o kulaagh le key chale
Jo deen kawwon ko de baitthe un ko yaksaan hay
Kulaagh le key chale yaa ulaagh le key chale
Raza kisi sag e Taibah key paaon bhi choome
Tum aur aah keh itnaa dimaagh le key chale
Comment