Jis Ghari Zindan Ka Dar Khola Gaya
Bibiyon Ko Dekh Kar Sajjad Ne Rokar Kaha
Allah Allah Aa Raha Hai Syedon Ka Kafila
Karbala Walon Ke Gham Mein Bichh Gaya Farsh E Aza
Samnay Jab Aaye Shahzadon Ke Sar
Shehzadiyan Roti Rahi
Haye Ali Asghar
Dhondh Kar Asghar Ka Sar Kehne Lageen Umme Rabab
Kash Main Bhi Dekh Pati Apne Bete Ka Shabab
Bari Bari Chumte Asghar Ka Sar
Shehzadiyan Roti Rahi
Haye Aun O Muhammad
2 Saron Ko Dekh Kar Fizza Ne Zainab Se Kaha
Aa Gaye Aun O Muhammad Lijiye Pursa Mera
Kar Diya Zainab Ne Sajda Khaak Per
Shehzadiyan Roti Rahi
Haye Aa Qasim
Aaya Jab Zindaan Mein 13 Baras Wale Ka Sar
Gul Hua Ibn E Hassan Ko Kha Gayi Kiski Nazar
Bain Farwa Ne Kiye To Cheekh Kar
Shehzadiyan Roti Rahi
Haye Ali Akbar
Jab Ali Akbar Ka Sar Aaya Qayamat Ho Gayi
Yun Laga Ke Umm E Laila Ki Shahadat Ho Gayi
Dekh Kar Akbar Ka Chehra Khoon Mein Tar
Shehzadiyan Roti Rahi
Haye Abbas
Hazrat E Abbas Ka Sar Aa Gaya Jab Ye Suna
Bibiyon Mein Matam E Abbas Barpa Ho Gaya
Band Aankhen Ba Wafa Ki Dekh Kar
Shehzadiyan Roti Rahi
Haye Hussain
Sar Hussain Ibn E Ali Ka Warid E Zindan Huwa
Zakhm Aulad E Ali Ka Aur Taza Ho Gaya
Chadaren Apne Saron Se Phenk Kar
Shehzadiyan Roti Rahi
Haye Sakina
Goud Main Baba Ka Sar Tha Aur Sakina Ko Qaza
Le Gayi Zindan Se Sajjad Ne Jab Ye Kaha
Bus Yahi Tak Tha Sakina Ka Safar
Shehzadiyan Roti Rahi
Akhtar O Irfan Koi Kya Bayan Kar Payega
Qaid Khane Ke Masaib Sun Ke Dil Phat Jayega
Takte Takte Raat Din Zindan Ka Dar
Shehzadiyan Roti Rahi
Comment