UMME RABAB – HASHIM SISTERS NOHA 2017-18 – MUHARRAM 1439

 

Madare Asghar, Madare Sakina,

Zaujae Hussain, Umme Rabab

Wafa Rabab ki bay misl hai zamaanay mein

Jhalak ussi ki hai Asghar kay muskuraane mein

Naseeb laaya unhe Hashimi gharaanay mein

Shareek ho gayin Islam ko bachaanay mein

Banaaya dasht ko gulzaar apne phoolon sey

Khiraaj leyliya Allah kay Rasoolo sey

Chorus

Hum auraton mein kahan apsi wafadaari

Na hosla, na shujaa’at, na voh fidakaari

Khuda kay deen pey jab waqt aagaya bhaari

Sitam kay aagay magar maamta nahin haari

Rabab apnay mujaahid ko bhej kar ran mein

Shabab dey gayin deen e Khuda ko bachpan mein

Chorus

Sunakay loriyon mein daastaan e Sher e Khuda

Banaaya Asghar e Masoom ko jari aisa

Banaakay nanha sipaahi yeh maamta ney kaha

Lagay jo teer galay pey tou muskura dena

Hussainiat ka bharam meray laal rakhna hai

Quran e sabr ki tafseer tumko karna hai

Chorus

Rabab teri wafadaarion ko laakhon Salaam

Tamaam kargayin qurbaaniyan Hussain kay naam

Zamaanay bhar kay khavateen ko diya payghaam

Museebaton mein bhi ehd-e-wafa karo anjaam

Hayaat dhoop mein gar, zeyr e asmaan rahey

Hussainiat ka magar sar pey saaeyban rahey

Chorus

Rabab jismay rahin voh makaan pyaara hai

Sukhan Hussain ka is baat ka ishaara hai

Paey jihaad jissay har sitam gaavara hai

Khuda ussi sey hai raazi, voh hi humaara hai

Jihaad e sabr mein faulaad ka jigar hain Rabab

Baraaey Zainab o Kulsoom ik sipar hai Rabab

Chorus

Rivaayaton mein hai, Bibi ki daastaan e wafa

Kay jab nishaana koi patharon sey leta tha

Yeh soch karke na zakhmi hon Zainab e Kubra

Barhaakay apne hi maathay ko vaar rok liya

Lahu lahaan hui patharon sey payshaani

Bhulaayi jaa nahin sakti kabhi yeh qurbaani

Chorus

Aey Bibi aapkay gham ko bayaan karoon kaisay

Uthaaey daagh yateemo kay kis kaleyje sey

Kabhi Sakina pey hotay huay sitam dekhay

Balaaein li kabhi Asghar kay sar ki nezay sey

Kabhi Jalay huay jhoolay ko yaad karti thi(n)

Kabhi Hussain ki ghurbat pey aah bharti thi(n)

Chorus

Nigaar aakhri saanson talak Rabab e hazeen

Lagakay seenay se jhoolay ki lakriya roeen

Na thanda paani piya aur na saaey mein baythi(n)

Kabhi Sakina ki tanhaai par tarap uthi(n)

Adeeya Saania Mahum, Rabab ka gham hai

Bapa hai Noha o Matam Rabab ka gham hai

Chorus

Leave a Reply

Your email address will not be published.

This site uses Akismet to reduce spam. Learn how your comment data is processed.