Nohay 2021 | Ghareeb Ka Ghareeb Sar

 

 

Ya Hussain

Kabhi Yeh Shareen Ky Ghar Mila Hai
Kabhi Yeh Rahib Ky Ghar Gaya Hai
Kabhi Shajar Py Rasan Sy Bandha
Kabhi Yeh Sandooq Mein Rakha Hai

Na Jany Is Ka Safar Hai Kaisa
Nahi Hai Mazloom Koi Aisa
Ghareeb Ka Yeh Ghareeb Sar Hai
Jo Dar Badar Hai

Hai Reesh Jis Ki Lahoo Mein Doobi
Ragen Bhi Sookhi Hui Hain Jis Ki
Bhari Hai Zulfon Mein Khak Haye
Katy Hain Lab Aur Jabeen Hai Zakhmi
Ayaan Hain Chehry Sy Gham Bala Ky
Ho Jaisy Maara Rula Rula Kay
Ghareeb Ka Yeh Ghareeb Sar Hai
Jo Dar Badar Hai

Chala Tha Jis Waqt Is Py Khanjar
Tha Goud Mein Fatima Ki Yeh Sar
Kharhi Thi Sattar Qadam Py Zainab
Gira Yeh Sar Jab Zameen Py Kat Kar
Uthaya Zulfon Sy Shimr Ny Sar
Tapak Raha Tha Lahoo Zameen Par
Ghareeb Ka Yeh Ghareeb Sar Hai
Jo Dar Badar Hai

Sawar Nok E Sinaan Py Ho Kar
Chala Hai Karbobala Sy Yeh Sar
Nazar Hai Akbar Ky Sar Ki Janib
Ajeeb Ghurbat Ka Hai Yeh Manzar
Kary Yeh Akbar Sy Jab Bhi Baten
To Khoon Roti Hain Is Ki Ankhen
Ghareeb Ka Yeh Ghareeb Sar Hai
Jo Dar Badar Hai

Nazar Parhy Jab Behan Ky Sar Par
Pukary Abbas Ko Tarhap Kar
Tamanchy Jab Bhi Sakina Khaye
Zameen Py Gir Jaye Haye Yeh Sar
Koi Jo Abid Py Zulm Dhaye
Pukary Naizy Sy Haye Haye
Ghareeb Ka Yeh Ghareeb Sar Hai
Jo Dar Badar Hai

Giri Thi Naaky Sy Jab Sakina
Waheen Yeh Sar Bhi Thehar Gaya Tha
Nazar Na Aai Jab Is Ko Beti
Tarhap Ky Zainab Ki Simt Dekha
Kaha Yeh Zainab Sy Jald Jao
Meri Sakina Ko Dhund Lao
Ghareeb Ka Yeh Ghareeb Sar Hai
Jo Dar Badar Hai

Yeh Sar Jo Khooli Ky Hath Aaya
Ajeeb Zalim Ny Zulm Dhaya
Ghar Us Ky Zahra Tarhap Ky Pahunchi
Jab Us Ny Tandoor Mein Chupaya
Kiye Jo Zehra Ny Bayn Ro Kar
Tarhap Raha Tha Hussain Ka Sar
Ghareeb Ka Yeh Ghareeb Sar Hai
Jo Dar Badar Hai

 

Sitam Yeh Darbar Mein Hua Tha
Ghareeb Sar Tasht Mein Rakha Tha
Yazid Dandaan E Shah E Deen Par
Charhi Ko Hans Hans Ky Marta Tha
Sakina Abid Ko Dekhti Thi
Pidar Ki Ghurbat Py Ro Rahi Thi
Ghareeb Ka Yeh Ghareeb Sar Hai
Jo Dar Badar Hai

Hai Sham Ki Qaid Ka Yeh Manzar
Mila Sakina Ko Baap Ka Sar
Raza O Zeeshan Thi Qayamat
Kaha Sakina Ny Jab Lipat Kar
Naseeb Kya Ho Gaya Hamara
Hai Mery Seeny Py Sar Tumhara
Ghareeb Ka Yeh Ghareeb Sar Hai
Jo Dar Badar Hai

 

Comment

Your email address will not be published. Required fields are marked *